Poslovne vijesti - Makedonija

Штедилницата „Интер фалко“ престанува со работење

Гувернерот на Народна банка на Македонија донесе решение со кое се издава претходна согласност за престанување со работа на штедилницата „Интер фалко“.

Со решението, според член 154 од Законот за банките, е укината дозволата за основање штедилница издадена во 1993 година, и е утврдено дека се исполнети условите за спроведување на ликвидациска постапка. Од денот на донесување на решението, до денот на уписот на ликвидаторот во трговскиот регистар, штедилницата треба да престане со извршувањето на сите активности, освен со наплатата на побарувањата.

Врз основа на доставената документација со состојба на 30 ноември годинава, штедилницата располага со имот кој е доволен за намирување на доверителите и депонентите. „Врз основа на член 170 од Законот за банките, НБМ го достави решението заедно со предлогот за спроведување ликвидациска постапка до надлежниот суд. Според член 157 од овој закон, судот треба да донесе решение за спроведување ликвидациска постапка најдоцна во рок од три работни дена од приемот на предлогот“, се вели во соопштението од НБМ.